Sabemos que en Galicia hai unha produción cultural, relacionada co mundo infantil, de moi boa calidade, pero pouco visible.

As nais e os pais non dispoñen de información sobre como e onde poden adquirir estes produtos. No canto de atoparse con eles, teñen que se esforzar por buscalos. E ademais, en xeral, a distribución existente é sempre unha distribución sectorializada (música nas tendas, libros nas librarías, xoguetes educativos nas xogueterías, …), o que impide que os potenciais compradores teñan unha percepción global da oferta existente.

É por isto que con Liquilí tentamos crear un punto de referencia na Internet para a información e compra de produtos culturais en galego destinados a público infantil, a través da creación dunha e-tenda que unifique e visibilice a oferta existente e a poña en relación coa potencial demanda.

O portal electrónico de Liquilí tentará ademais ser un dos principais referentes de todo o que teña relación coa cultura infantil en Galicia. Queremos ser un dinamizador cultural de todo o relacionado cos máis pequenos. Os libros, os discos, os videoxogos, as series de animación, os filmes, os xoguetes, o teatro, os concertos, os diversos festivais… todo ha de reflectirse no Liquilí.